فارس الاحلام
Admin
عدد الرسائل : 73
تاريخ التسجيل : 10/11/2008
 |  موضوع: عم حمزة وحكايته مع غزة  الجمعة يناير 16, 2009 9:03 am | |
| أمبارح رحت أجيب الجرنان من عم حمزة بتاع الجرايد وحصل بنا الموقف ده ....ا
- صباح الخير يا عم حمزة
- صباح الخير يا أستاذ محمد
- عامل أيه يا عم حمزة فى الدنيا دى
- أنت أحسن تقولى يا هم حمزة .. أهيه عايشة يا أستاذنا مستورة والحمد لله .. بس اللى بيحصل فى غزة مزعلنا كلنا والله .. الواحد بيشوف الصور بيبقى مش قادر يشتغل والله العظيم ..
- ولو قريت المكتوب فى الجرايد هاتموت من الغيظ يا عم حمزة .. إلا صح يا عم حمزة أنت ليه ماتعلمتش القراية والكتابة لحد دلوقت
- عشان الأيام اللى زى دى يا أستاذ محمد
- بس أنت كده بتخالف برنامج القراءة للجميع بتاع ماما سوزان
- أهو خلينا نخالف فى حاجة واحدة .. خلينا نقول لأ مرة واحدة .. خلينا نقول كفاية
- بس أنا برضه لازم أقرالك المكتوب فى الجرايد اللى أنت بتبعهنا
- قول يا ستاذ خلينا نحس أننا عايشين مع الناس شوية
- الريس بتاعنا يا سيدى "بابا حسنى يعنى" بيقولك "معبر رفح مفتوح من الناحيتين علشان الناس دى بتوع غزة
عم حمزة : لا ياريس مش المعبر لوحده اللى "مفتوح" من الناحيتين
- السيدة ليفنى وزيرة خارجية إسرائيل تقول إنها تشعر بالأسى لما يحدث لأهالى غزة
عم حمزة : عندك حق هما الفلسطنين اللى بيعترضوا طريق القنابل والصواريخ ورصاص الجنود الكلاب الإسرائيليين
- قطر واليمن والسودان يهاجمان مصر بسبب ما يحدث فى غزة
عم حمزة : هه .. مش قطر دى اللى وزير خارجيتها كان بيصيف فى إسرائيل ساعة حرب لبنان 2006 وقطع أجازته وذهب ليحضر مؤتمر النقمة قصدى القمة العربية واليمن دى اللى ساعة عبد الناصر ما خد قرار بأمدادها بالجنود المصريين لمساعدتها فى الحرب وكان ذلك من أسباب هزيمة 1967 والسودان اللى كل شوية تترمى فى حضن مصر مع كل مصيبة تقابلها
- ههه ما أنت متابع أهوه يا عم حمزة
- طب بص يا سيدى الرئيس الليبى معمر القذافى بيقولك "الجنود الإسرائيلين بيحفروا قبرهم بأيديهم
عم حمزة : يا عم قوله بالراحة كده أحسن هو أول واحد يقع فى القبر ده
- وعندك مجمع البحوث الإسلامية مطلع بيان بيقول أن ما يحدث فى غزة هو عمل إجرامى وجريمة حرب
عم حمزة : فعلاً العالم كله كان فى إنتظار هذا البيان ليعرفوا فعلاً ما هو هذا الشئ الغريب العجيب الذى يحدث فى غزة دى
- نفتح صفحة الحكومة .. أه .. الحكومة عاملة إعلان عن فرص عمل جديدة وعن قروض للشباب بتقولك إلحق القطار قبل ما يفوتك "قطار العمل يعنى"
عم حمزة : هههههه .. حكومة ناصحة فعلاً .. إختارت الوسيلة اللى كل يوم بتعمل حوادث عشان تخلص من الناس اللى كل شوية يشتكو
- هههه .. حلوة يا عم حمزة .. بتقولك الحكومة برضه لازم تكون إيجابى وما تكنش سلبى عشان تكون ناجح فى حياتك
عم حمزة : اللى بيته من إزاز ما يحدفش الناس بالطوب
- الحكومة تفكر فى بيع شبكة النقل والمواصلات لمستثمر أجنبى
عم حمزة : حتى المواصلات دى بريطانيا أم الرأسمالية معملتهاش .. الواحد كان يشوف فى أفلام ومسلسلات زمان إزاى الواحد كان بيدافع عن أرضه ومايرداش يبعها ولو بكنوز الدنيا شفت مسلسل بكيزة وزغلول يا أستاذ محمد وشفت إزاى 2 ستات فضلوا متمسكين بالقصر بتاعهم رغم الفقر اللى كانوا فيه.
- نخش على صفحة الفن بقى .. نحاول نخرج من المود ده يا عم حمزة .. الست روبى بتقولك "أنا إنسانة خجولة بطبيعتى"
عم حمزة : عندك حق همه الناس اللى وحشين لأن دايماً عندهم فضول يعرفوا ما تحت الهضوم
- ههههه .. أيه الشعر ده يا عم عطوة إنت بتقول أشعار ولا أيه
- صفحة الرياضة : بيقولك هنرى ميشيل رفض تدريب نادى الزمالك
عم حمزة : هو اللى رفض كمان .. مش ده المدرب اللى سابهم من غير إعتذار أو حتى إستأذان هو إحنا أيه ما عندناش دم ولا كرامة حتى فى الهلث واللعب
والله عندك حق يا عم حمزة ..... عم حمزة .... إنت فين يا عم حمزة ...؟؟؟؟!!!!!
إكتشفت إن كل ده كنت بكلم نفسى وكنت برد على نفسى ومافيش عم عطوة ولا حاجة وإفتكرت فاروق جويدة لما قال
عشت أسأل أين وجه بلادى ؟؟ ... أين النخيل .. وأين دفء الوادى ..؟؟
لا شئ يبدو فى السماء أمامنا .. غير الظلام وصورة الجلاد
هو لايغيب عن العيون كأنه .. قدر كيوم البعث والميلاد | |
|
